Англиската фудбалерка Бет Мид ќе остане запишана како прва која го „пробала“ новото правило во фудбалот во врска со двојниот контакт со топката при пеналите.
Мид погоди за водство од 1-0 во пенал серијата, но таа се лизна, топката ги допре двете нозе и голот беше поништен поради „двоен контакт“, а новината е што пеналот беше повторен и одново изведен.
Досега, при ваков случаен контакт судиите досудуваа дека нема гол и немаше повторување на ударот од 11 метри.
Но, по контроверзите со пеналот на Хулијан Алварез против Реал Мадрид во осминафиналето на Лигата на шампионите, се промени правилото и сега во вакви ситуации пеналот повторно ќе се изведува, а нема да се поништи.
Новото правило кое почна да важи месецов вели: ако играч случајно ја допре топката двапати, како на пример со лизгање, и постигне гол, пеналот ќе биде изведен повторно, наместо да биде поништен. Ако пеналот е промашен по тој двоен допир, ќе се важи како промашен удар. Меѓутоа, ако се докаже дека двојниот допир бил намерен, пеналот се санкционира како и порано, голот се поништува и се досудува индиректен слободен удар за противничкиот тим.
Така Мид вечерва доби втора шанса, но не го реализираше пеналот од „втора мајка“. И покрај оваа негатива во првата серија, Англичанките на крајот сепак победија на пенали со 3-1 и ја прославија втората европска титула по ред.
