Фановите на егзотичниот фудбал, неочекувани резултати и сè што нуди африканскиот фудбал се воодушевени затоа што денеска започнува Африканскиот куп на нации, континенталното натпреварување што се игра во Мароко.
Африканскиот куп на нации можеби не е најквалитетното континентално фудбалско натпреварување, но поради егзотиката и целата атмосфера, станува посебен турнир и за многу фанови најинтересен, бидејќи никој не може ништо да предвиди.
Најдобрите играчи од Африка отпатуваа на овој континент и ги напуштија своите клубови за да се борат за африканскиот трон. Натпреварувањето се игра во Мароко, и иако резултатите на овој турнир никогаш не можат со сигурност да се прогнозираат, сега има изразен фаворит како никогаш претходно.
Тоа е репрезентацијата на Мароко, домаќинот на турнирот и најдоминантната фудбалска сила во Африка, каква долго време не е видена на овој континент. Мароканците се полфиналисти на Светското првенство, доминираат во африканскиот фудбал и сè освен тие да ја освојат титулата ќе биде вистинско изненадување.
Мароко вечерва го отвора турнирот. Со натпревар против селекцијата на Комори (20:00 часот) го започнува патот кон трофејот.
Мароко е предводен од големи ѕвезди на европскиот фудбал како Брахим Дијаз од Реал Мадрид, Ашраф Хакими од ПСЖ, Нусеир Мазрауи од Манчестер јунајтед, Јусеф Ен-Незири од Фенербахче, Билал Ел Ханус од Штутгарт и многу други.
По Мароко, во вториот ред фаворити традиционално се силните селекции на Сенегал, Египет, Алжир, Нигерија и Брегот на Слоновата Коска, додека како „мински полиња“ се сметаат ДР Конго, Јужна Африка, Камерун и Тунис.
На турнирот се пласираа 24 најдобри репрезентации од Африка, поделени во шест групи по четири тимови. Во нокаут-фазата се пласираат по две најдобри селекции од секоја група, како и четирите најдобропласирани трети тимови.
Еве ги групите:
Група А: Мароко, Мали, Замбија и Комори
Група Б: Јужна Африка, Зимбабве, Египет и Ангола
Група В: Танзанија, Нигерија, Тунис и Уганда
Група Г: Сенегал, Боцвана, ДР Конго и Бенин
Група Д: Алжир, Екваторијална Гвинеја, Буркина Фасо и Судан
Група Ф: Камерун, Габон, Мозамбик и Брег на Слоновата Коска
