Машката сениорска кошаркарска репрезентација на Македонија вечерва од 19 часот во салата „НБ Ноел“ во Негорски Бањи против Швајцарија ќе го одигра својот прв подготвителен натпревар и ќе се покаже до каде е стигнат во моментов тимот на селекторот Марјан Илиевски.
Тимот се подготвува за претквалификациите за Светското првенство 2027, првиот официјален меч е на 2 август во Куманово против Романија, па денешниот и утрешниот тест против Швајцарија добро ќе му дојдат на подмладениот состав.
Во драстично подмладената Македонија, највозрасни се Џејкоб Вајли со 31 и Андреј Магдевски со 30 години, има неколку дебитанти. Отсуството на повеќемина искусни репрезентативци ќе биде проблем, но ќе постои голема желба за докажување.
Магдевски е новиот капитен и наследник на Војдан Стојановски.
„Голема чест ми е што ќе го заменам Војдан ова лето. Со капитенската лента доаѓа и поголема одговорност на теренот, како и во соблекувалната. Ќе се обидам атмосферата во екипата да остане како што била и до сега, и на теренот сите да продолжиме да играме за тимот и да гинеме за секоја топка“ – вели плејмејкерот.
