Точно уште една недела останува до најважниот меч сезонава, финалето во Лигата на шампиони. Англиските ривали Ливерпул и Тотенхем во Мадрид ќе водат битка за континенталниот престол. Ливерпул е клуб кој во својата историја пет пати бил европски првак, а минатата сезона загуби во финалето од Реал Мадрид.
За разлика од гигантот од „Енфилд роуд“, Тотенхем е клуб кој го прави најголемиот успех во клупската историја. Лондончани за прв пат ќе играат во финалето на елитното натпреварување на УЕФА. Тренерот на тзотенхем, Маурисио Покетино е умерен во изјавите, но сепак фаворитската улога ја отстапи на противникот. Покетино објасни дека само поради една причина го прави Ливерпул да е фаворит, а тоа се потрошените пари за нови играчи.
Тотенхем е првиот клуб кој успеал во двата преодни рока да не доведе ниту еден играч, а сега ќе се бори за европската круна.
„Ливерпул е финалист од лани. Сезонава тие се бореа со Манчестер сити за трофејот во Премиер лигата. Фаворити се затоа што инвестираа многу пари. Доведоа квалитетен и скап дефанзивец, а платија и голман за рекордни 75 милиони фунти. Планот на Ливерпул беше да ја освојат Премиер лигата и Лигата на шампиони. Планот на Тотенхем е да ја има најдобрата сезона во клупската историја. Сме играле многу пати едни против други и нема што да биде изненадување“, изјави Покетино.
Финалето во ЛШ се игра на 1 јуни во Мадрид, на стадионот „Ванда Метрополитано“, домот на Атлетико.
