Потрагата по авионот со кој фудбалерот Емилијано Сала и 60-годишниот пилот Дејвид Иботсон летаа кон Кардиф може да биде прекината денеска доколку полицијата која ја пребарува областа во која исчезна леталото процени дека шансите да најдат нешто се целосно загубени. Авионот нема таканаречена „црна кутија“ и засега нема никакви резултати во потрагата по некакви остатоци или сигнали за да се дознае што точно се случило.
Контактот со авионот се загуби во понеделникот вечерта и се чини дека само чудо може да помогне во Ла Манш да се најдат делови од авионот или телата на патниците.
Целиот фудбалски свет се моли за чудо и Сала да биде пронајден жив, но како што одминува времето, така и оптимизмот се намалува. Клубот Кардиф, кој го купи Сала од Нант за 17 милиони евра, најверојатно ќе остане без планираното засилување, па „сините птици“ веќе почнаа потрага по нов напаѓач кој би им помогнал во борбата за опстанок во Премиер лигата.
