Голем скандал се разгоре на натпреварот од Конференциската лига меѓу Рајо Ваљекано и Лех Познањ. Претставници на полскиот клуб на социјалните мрежи ги споделија своите впечатоци од гостинската соблекувална на стадионот „Кампо де Вајекас“, отворен во 1976 година.
Еден од задолжените за опремата на Полјаците објави материјал на социјалните мрежи, во кој се згрозил од условите во соблекувалната.
„Најпрво наидовме на ѕид од картонски кутии. Тоа е доста необично за фудбалска соблекувална, но мистеријата брзо беше решена — внатре имаше шишиња со минерална вода, која, секако, е неопходна за фудбалерите“, изјавија од Лех.
Потоа тој покажа голем куп пешкири, наредени на една од клупите во соблекувалната, кои ги нарече „реликвија од минатото“.
„Тука се чувствува автентичниот фудбал од старите времиња. Може да го почувствуваш, да го видиш и да го слушнеш. Правилата бараат секој тим да обезбеди пешкири за гостите, но никогаш не сум видел вакво нешто на ниту еден стадион. Ова е еден вид фолклор. Оваа соблекувална ме потсетува на минати среќни времиња — малку е тажно и малку страшно“, додаде вработениот на Лех.
Видеото покажува и просторија за тренерите, која менаџерот ја спореди со „забава од 80-тите“, посочувајќи дека во неа нема осветлување.
„Се прашувавме како подобро да го осветлиме просторот за да ви го покажеме. Го баравме прекинувачот за светло — и мистеријата беше решена: едноставно, нема прекинувач. Нема начин да се вклучи светлото. Единствениот извор на светлина се горните светлосни прозорци. Малку светлина се пробива од ходникот“, беше неговиот коментар.
Исто така, беше забележано дека некои од закачалките биле скршени.
Ова, логично, предизвика гневна реакција во таборот на Шпанците. Претседателот на Рајо Ваљекано експлодира со остар коментар, нагласувајќи дека ваквите постапки само ја подгреваат тензијата.
„Ова е одвратно, неописливо. Роналдо и Меси се пресоблекуваа овде и никој не се пожалил. А ниту еден играч на Лех не е на нивно ниво. Овој стадион ги исполнува сите барања на УЕФА. Не е луксузна соблекувална, но е сосема пристојна. Да се потсмеваш на другите е тажно. Ваквите нешта само ја ескалираат ситуацијата. Фудбалот треба да обединува, а не да разделува“, изјави претседателот на Рајо Ваљекано за шпанскиот весник „Марка“.
