Српскиот првак Црвена ѕвезда го доживеа првиот пораз сезонава во Лигата на Европа откако на гостувањето кај Порто загуби со 2-1. Португалскиот тим поведе уште во осмата минута, со гол од пенал на Вилијам Гомеш.
Белградскиот тим израмни во 30-тата минута преку 17-годишниот Василије Костов. Меѓутоа, во 90-тата минута Мора погоди по еден противнапад и го донесе триумфот на Порто.
Ренџерс со Бојан Миовски на теренот претрпе втор пораз, губејќи со 2-1 на гостувањето кај Штурм. Македонскиот напаѓач одигра едно полувреме.
Динамо Загреб стигна до втора победа, совладувајќи го Макаби со 3-1 на гостувањето. Домаќините поведоа во 14-тата минута, но хрватскиот тим со голови во 16-тата и 19-тата минута направи целосен пресврт.
Во останатите натпревари постигнати се следните резултати: Базел – Штутгарт 2-0, Селта – ПАОК 3-1, Генк – Ференцварош 0-1, Лион – Салцбург 2-0, Нотингам форест – Митјиланд 2-3.
