Напаѓачот на Баерн Минхен, Хари Кејн, ќе го пропушти саботниот натпревар од Бундеслигата против Фрајбург, но тренерот Венсан Компани се надева дека ќе може да смета на него за дуелот од Лигата на шампионите против Реал Мадрид следната недела.
„Хари тренираше одлично до неделата, но почувствува болка во глуждот додека беше со репрезентацијата на Англија. Затоа утре нема да биде на располагање“, изјави Компани.
„Сепак, оптимист сум за вторник. Би сакал да игра против Фрајбург, но тоа не е можно“, додаде стратегот на минхенскиот гигант.
Покрај отсуството на Кејн, Баерн ќе биде без суспендираниот Николас Џексон. Добрата вест е враќањето на Џамал Мусијала и Алфонсо Дејвис, а голманот Мануел Нојер повторно е во составот по кратката криза на таа позиција, при што шансата ја доби и резервниот чувар Свен Улрих.
„Ќе видиме кој ќе започне како стартер против Фрајбург, но генерално составот ни е речиси комплетен“, додаде Компани.
