Новата сезона на Лигата на шампионите штотуку започна, а веќе го добивме првиот тим што обезбеди место во следното издание — и тоа од Фарските Острови. Клубот Клаксвик ја освои шампионската титула две кола пред крајот на првенството и веќе во октомври 2025 година си го обезбеди местото во квалификациите за Лигата на шампионите 2026/27.
По 25 одиграни кола, Клаксвик има 67 бода, седум повеќе од најблискиот ривал Рунавик, па математиката е јасна, новиот шампион е познат.
Клаксвик е најтрофејниот клуб на Островите, основан во 1904 година, и ова е нивна 22-ра титула. Тимот ќе ги одигра последните две кола без притисок, пред да замине на заслужен одмор.
Клубот веќе има искуство со европски натпревари, во сезоната 2023/24 влезе во групната фаза на Конференциската лига, станувајќи првиот тим од Фарските Острови кој играл „европска есен“, со што влезе во историјата на тамошниот фудбал.
Како и повеќето скандинавски земји, Фарските Острови го играат своето првенство од април до октомври поради студените зими. Сличен систем имаат и Шведска, Норвешка, Летонија, Естонија, Литванија, Белорусија, Казахстан и Ирска.
Покрај Клаксвик, уште два клуба, Рунавик и Торшавн, веќе обезбедија место во квалификациите за Конференциската лига во сезоната 2026/27.
Клаксвик има шанса и за двојна круна бидејќи на 31 октомври ќе го игра финалето на Купот против Викингур, кој исто така е блиску до европско место.
Со тоа Фарските Острови станаа првата земја во Европа што веќе девет месеци пред крајот на сезоната ги знае своите претставници во европските купови — вистински фудбалски куриозитет.
