Европската ракометна федерација, ЕХФ, и официјално го објави распоредот на натпреварите за групната фаза од Лигата на Европа. Вардар се најде во група со Кристијанстад, Тулуз и победникот од дуелот на хрватскте екипи Дуго село и Сесвете.
„Црвено-црните“ на 14-ти октомври започнуваат на домашен терен токму со една од хрватските екипи, а една седмица подоцна ќе му гостуваат на француски Тулуз.
Следуваат 20-тина дена пауза во Лигата на Европа, а потоа и четири натпревари по ред. На 11-ти ноември Вардар ќе го пречека Кристијанстад, а една седмица подоцна ќе гостува на истата екипа. Следува гостување во Хрватска, а на последниот меч од групната фаза, Вардар ќе го пречека Тулуз на втори декември.
Македонија може да има и втор претставник во групната фаза од второто по ранг европско ракометно натпреварување, но тоа ќе се случи само ако Алкалоид успее во квалификациите да го елиминира германски Хановер.
