Најдобрите американски кошаркари летово ја исполнија мисијата да го доведат олимпиското злато од Париз. Ѕвездите во дресот на селекцијата на САД во финалето ја победија Франција, а пред тоа во полуфиналето се намачија, но беа подобри и од Србија.
Сега сите тие ѕвезди имаат одмор, а потоа повторно ќе се фокусираат на клупскиот план и почетокот на новата сезона во НБА-лигата. Челниците на НБА одлучија дека новата сезона во НБА ќе започне на 22 октомври.
Одлучено е и Олстар-мечот да биде на 16 февруари, додека почетокот на плејофот, односно разигрувањето за титулата ќе биде на 19 април. Финалната серија треба да започне на 5 јуни.
Договорено е три меча да се играат во странство. На 2 ноември ќе играат Мајами и Вашингтон во Мексико, а потоа следуваат два меча меѓу Индијана и Сан Антонио, кои ќе се играат на 23 и 25 јануари во Париз.
