Вчера во италијанската спортска јавност главна вест беше упадот на финансиската полиција во просториите на Милан, како и во домовите на дел од поранешните и актуелни функционери на Росонерите, а денеска е позната причината за упадот.
Обвинителот Џовани Полици, кој ја води истрагата, ги сомничи извршниот директор на Милан, Џорџо Фурлани, неговиот претходник Иван Газидис, како и уште двајца менаџери, на кои адреса на живеење им е Луксембург, за „изнесување материјални податоци“ кои не се вистинити, за прикривање, за измама…
Финансиската полиција освен во просториите на Милан, кои се наоѓаат на улицата „Алдо Роси“, ги претресла и домовите на обвинетите и ги запленила компјутерите и мобилни телефони.
Според обвинителот Полици, тие при преземањето на клубот на инвестицискиот фонд „Ред Бирд“ ја попречувале работата на надзорното тело за комуникации во Италијанската фудбалска федерација и го криеле вистинскиот сопственик на Милан.
Обвинителството се сомнева дека Милан всушност не е во сопственост на американскиот ивенстициски фонд „Ред Бирд“, чиј основач е Гери Кардинале, кој во 2022 година го купи клубот за повеќе од милијарда евра од друг американски инвестициски фонд „Елиот“.
Според истрагата на обвинителството, Милан сè уште е во сопственост на фондот „Елиот“, а продажбата била фиктивна.
„Од анализата на собраната документација се појави основано сомневање во вистинскиот сопственик на Милан“, соопшти обвинителството во Милано.
