На денешен ден пред 30 години на интересен начин почна Премиер лигата, односно новиот формат на англиското првенство што и денеска се игра по истиот систем и со истото име.
Во првото коло на 15 август во 1992 година се случи чудо и ниту една екипа од големата шесторка на англискиот фудбал не успеа да победи.
Манчестер јунајтед, Ливерпул и Арсенал загубија, а Манчестер сити, Челзи и Тотенхем одиграа нерешено, што е неверојатен старт и еден од најчудните денови во 30-годишната историја на Премиер лигата.
Викендов со натпреварите од второто коло во Англија беше одбележана 30-годишнината од Премиер лигата, а денеска точно на датумот кога почна проектот ќе играат Ливерпул и Кристал палас.
Убедливо најтрофеен клуб во оваа ера од три децении е Манчестер јунајтед со 13 титули, по пет имаат Челзи и Манчестер сити, три освои Арсенал, а по една им припадна на Блекбурн, Лестер и на Ливерпул.