Новите спортски херои, фудбалерите на македонската репрезентација, рано утрово пристигнаа во Македонија. Поради густата магла што ја имало крај скопскиoт аеродром, авионот од Грузија слета во Приштина.
Од Приштина, со автобус фудбалската експедиција пристигна на македонската граница, а таму прв ги пречека премиерот Зоран Заев. Македонската влада доцна синоќа донесе одлука парично да ги награди сите членови на репрезентацијата со по 10.000 евра.
Премиерот лично им честиташе на фудбалерите за големиот успех, а потоа на својот фејсбук-профил упати и порака.
„Голема е радоста што вечерва ја преплави целата земја.
Оваа радост ја донесоа македонските фудбалски јунаци кои ги оставија срцата на теренот во Тбилиси и донесоа победа која македонската историја не ја памети до сега, со што македонската фудбалска репрезентација ќе учествува на Европското фудбалско првенство.
Целата држава, сите македонски граѓани ја споделуваат радоста за успехот на фудбалската репрезентација.
Еден гол за сите, една победа за сите!
Така е кога заедно играат Македонци, Албанци, Турци… во исти дресови, под исто знаме и за заедничката татковина. Ова покажува дека само заедно можеме еден за сите, сите за еден.
Јас и првиот вицепремиер Артан Груби сме овде да ја споделиме радоста и да ви укажеме чест и да ви соопштиме дека во името на Владата и на граѓаните, сите членови на фудбалската репрезентација ќе бидат наградени со по 10.000 евра.
Ова е успех достоен за големо славење, но должен сум да апелирам и да замолам и вие да го направите тоа и да апелирате и во овој момент да се почитуваат мерките за заштита од КОВИД-19 кои забрануваат собири.
Честитам уште еднаш.
Да им посакаме успех и здравје!
Да живее македонскиот фудбал!“.
