Манчестер јунајтед и Челзи утре ќе се сретнат на „Вембли“ во рамки од второто полуфинале во ФА купот. За клучниот меч, Френк Лампард има проблем бидејќи не може да смета на Н’голо Канте.
Францускиот играч за врска се повреди пред околу две недели во победата над Ватфорд, а болките во задната ложа уште ги нема надминато, па не може да се стави на располагање кај англискиот стратег. Лампард пак, во својата прва сезона на кормилото на Сините, ќе се обиде да освои трофеј, но прво ќе мора да најде начин како да ги надигра расположените Црвени ѓаволи.
„Канте не е „фит“ за дуелот против Јунајтед. И натаму има проблеми со задната ложа, така што тој не е опција за составување на тимот. Меѓу другото, има неколку играчи кои се во трка со времето да бидат подготвени за настап, така што ќе го следат развојот на настаните во следните 24 часа“, истакна Лампард.
Дуелот Манчестер јунајтед – Челзи е закажан за утре во 19 часот, додека ден порано, односно вечерва ќе се сретнат Арсенал и бранителот Манчестер сити во првото полуфинале.
