Со голот на Каи Хаверц од пенал во 115-та минута, Челзи на европската ја придодаде и светската клупска титула. Сините од Лондон во Абу Даби го победија јужноамериканскиот првак Палмеирас со 2-1, по продолженија, откако во регуларните 90 минути беше 1-1.
Челзи е третиот англиски тим кој стана светски првак, после Манчестер јунајтед во 2008 и Ливерпул во 2019.
Капитенот на Челзи, Сезар Аспиликуета, пред десет години играше за Челзи во поразот од Коринтијанс, и еве сега дочека сепак да ја освои титулата светски клупски шампион. Шпанскиот бек го изнуди пеналот, после негов шут, играч на Палмеирас играше со рака во својот 16-ник.
Од последните 15 финалиња, на 14 славеа европските прваци. Исклучок е Челзи кој загуби од Коринтијанс во 2012 година.
Инаку, Обединетите Арапски Емирати се среќни за европските тимови. Кога завршницата на светското клупско се играло во таа земја, а тоа е пет пати, секогаш победуваат тимовите од Стариот континент.
