Македонската Прва лига почна скромно со само четири погодоци на пет меча од првото коло во новата сезона, а главните кандидати за титулата, Шкендија и Шкупи не победија.
Актуелниот првак Шкендија наиде на тврд орев и не успеа како гостин да го победи новакот во Лигата, Тиквеш. Кавадарчани беа домаќини во Прилеп и освоја голем бод со реми без голови.
Идентично беше и во Штип, каде Брегалница го сопре Шкупи во меч без голови. Двете скопски екипи, Македонија Ѓорче Петров и Работнички како домаќни славеа со по 1:0 против Пелистер, односно Борец, а два гола, најмногу во првото коло имаше само во Тетово, каде Ренова и Скопје ремизираа 1:1.
Вечерва од 20 часот се игра последниот меч од првото коло меѓу Академија Пандев и Струга Трим Лум.
