Уште две победи му требаат на Новак Ѓоковиќ за да се изедначи со Роџер Федерер по бројот на титули на грен-слем турнирот Вимблдон, но според популарноста кај публиката во Лондон, Србинот е далеку зад Швајцарецот.
Ѓоковиќ не е популарен кај Британците и поради тоа што пред 18 години тој одби британско државјанство и да се натпреварува како Британец.
Таткото на Новак, Срѓан Ѓоковиќ, во едно интервју потврди дека во 2005 година имале понуда од Велика Британија, но веднаш ја одбиле.
„Сакаа тандемот Новак и Енди Мареј да им донесе титула во Дејвис купот. Се разбира дека немавме никаква дилема, ние сме Срби и ќе останеме Срби до крај. Како може да си ја продадеш душата за пари? На што би личело ако станевме Англичани? Како да се појавам пред татко ми или пред гробот на мајка ми и да им кажам дека моите деца се Англичани. Понудата дојде во време кога се вселивме во наш стан, после 17 години селења по туѓи станови низ Белград“ – раскажа Срѓан Ѓоковиќ.
Преговорите од британска страна ги водел таткото на тенисерот Џек Дрејпер, против кој Ѓоковиќ играше на Вимблдон пред три години.
