Женската ракометна репрезентација на Македонија со пораз го започна настапот на Европското првенство што се игра во Словенија, Црна Гора и во нашата земја.
Избраничките на селекторот Савевски се поразени од еден од фаворитите за титулата и актуелен олимписки шампион, селекцијата на Франција со 14:24
Децениското отсуство од континенталните собири си го направи своето, ракометарките иако желни да се прикажат во најдобро светло пред домашните навивачи, грешеа во нападот и тоа го користеа Французинките да постигнуваат лесни голови, и тоа беше честа слика во првото полувреме.
Првиот гол на натпреварот, Македонија го постигна во 16-та минута преку Јована Кипријановска, а до крајот на првиот дел, даде пет гола.
Но, ниту Французинките не беа расположени за реализација, и во првото полувреме дадоа 12 гола. Голема заслуга за тоа има одличната игра во одбрана на Црвено-жолтите со која „командуваше“ голманката Јована Мицевска која имаше пет одбрани во првиот дел.
И второто полувреме започна слично, Македонија повторно неколку минути се „мачеше“ да постигне гол, најдобрата ракометарка Сара Ристовска дури не реализира и седмерец, а тоа го казнија противничките кои во 34-та минута дојдоа до двоцифрена предност (5:15).
Првиот гол во вториот дел, Македонија го постигна во 35-та минута за 6:15, а дилемите околу победникот беа решени. До крајот на средбата, искусните Французинки рутински ја одржуваа предноста и на крајот славеа со 14:24.
Најдобра во редовите на Македонија беше Моника Јаневска со четири гола, три дадоа Сара Ристовска и Јована Саздовска, додека Јована Мицевска имаше девет одбрани.
Во второто коло од групата Ц, Македонија в понеделник од 18 часот во СЦ Борис Трајковски ќе игра против селекцијата на Холандија.
