Денеска во Белград се одржа 49-тиот Конгрес на Европската фудбалска асоцијација, УЕФА, а Фудбалската федерација на Македонија (ФФМ) ја претставуваа претседателот Масар Омерагиќ, генералниот секретар Леонид Јандреоски и потпретседателот Дрилон Ганиу.
Конгресот на УЕФА ги собра челниците на европскиот и светскиот фудбал, многу гости од светот на фудбалот и од различни сфери на општественото живеење.
На 49-тиот Конгрес беше избран составот на новиот Извршен одбор на УЕФА.
Во Белград првите луѓе на европскиот фудбал разговараа за иднината на европскиот и светскиот фудбал. Во својот говор, претседателот на УЕФА, Александар Чеферин, истакна зошто основните вредности на европскиот фудбал – единство, солидарност и тимска работа – се поважни од кога било во сè поподелениот свет.
„Ние сме обединет тим. Обединета сила и моќен сојуз. Европскиот фудбал мора да продолжи да биде модел на единство во сè поподелениот свет. Денеска стоиме овде заедно не затоа што сме исти, туку затоа што ја делиме истата страст за фудбалот. Ние не сме само љубители на играта, туку тука сме како луѓе кои се одговорни за иднината на фудбалот, кој е огледало на општеството. Зад нас е брилијантното ЕВРО 2024, кое беше фестивал на заедништво, натпреварувачки дух и радост.
Политиката може да гради ѕидови, но фудбалот гради мостови. Каде и да се свртиме денес, гледаме поделби. Кога го слушаме тоа секој ден, лесно е да поверуваме. Но, оваа поделба е илузија, тактика што ја користат оние кои сакаат да нè поделат, за политичка или за финансиска корист. Но, на таквите луѓе одговараме со еден глас. Европскиот фудбал мора да остане модел на заедништво, така и ќе остане. Ние почитуваме, градиме, поттикнуваме, поврзуваме, тоа е нашата мисија на која сме посветени.
Сакам да им се заблагодарам на сите национални асоцијации бидејќи вие сте столбот на европскиот фудбал. Фудбалот не ветува совршен свет, но ни покажува што е можно кога играме еден за друг“, порача Чеферин.
На Конгресот во Белград гостин беше и претседателот на ФИФА, Џани Инфантино.
