Рома одигра 1:1 на гостувањето кај Порто во првиот меч од плејофот за пласман во осминафиналето во Лигата на Европа, а по дуелот, тренерот на Римската волчица, Клаудио Раниери, беше многу лут.
Италијанскиот стратег е убеден дека главниот судија бил виновникот што Рома не успеала да победи на тешкото гостување во Португалија. Посебно го потенцира моментот кога сакал да направи замена непосредно пред Порто да израмни, но судијата не дозволил да биде направена замената.
„Најавивме дека ќе правиме замена. Тоа го знаеше и помошниот судија. Дојдовме за да победиме, одигравме добар меч и задоволен сум од играта на моите фудбалери. Сега сфаќам како може шефот на судиите во УЕФА, Роберто Росети, кој е исклучиво чесен и пристоен човек, на овој натпревар да делегира судија кој секогаш го поддржува домашниот тим. Од 22 меча на коишто судел овој судија, гостите немаат ниту една победа, само деветпати ремизирале, а во останатите средби победувала домашната екипа. Мислам дека само чекаше нешто да се случи во нашиот шеснаесетник за да му ја подари победата на противникот. Тоа беше јасно и затоа играчите беа нервозни“, објаснува Раниери.
Германскиот арбитер Стрелер им додели дури осум жолти картони на фудбалерите на Рома, а Кристанте во 72-рата минута заработи црвен картон.
„Ги предупредив фудбалерите да не се расправаат со судијата затоа што тој така постапува. Добивме осум жолти и еден црвен картон. Не ме сфаќајте погрешно, некои од картоните беа заслужени, но не можете да ги направите фудбалерите да бидат нервозни од самиот почеток. Не му честитав на судијата по мечот затоа што не го заслужи тоа. Ова веќе не е фудбал“, револтирано коментираше Раниери, кој додаде дека можеби е потребно ВАР-системот да се користи и за играчи кои симулираат и глумат.
