Рома ќе брка победа на денешниот дуел против СПАЛ на гости, но најверојатно со малку поразлична формација од таа кога досега играше тимот од Рим. Под водство на тренерот Еусебио ди Франческо, „римската волчица“ најчесто играше во формација 4-3-3.
Сепак, по доаѓањето на Клаудио Раниери на клупата, тренерот најавува промена и во формацијата. Наместо 4-3-3, против СПАЛ ќе се игра во формација 4-4-2. Тоа е формацијата во која Рома играше во првиот мандат на Раниери. Тогаш во нападот ги имаше Тоти и Вучиниќ, а сега таму треба да бидат Един Џеко и Патрик Шик.
Рома победи против Емполи во првиот меч по доаѓањето на Раниери, а сега навивачите на тимот од главниот град на Италија очекуваат нови три бода од гостувањето кај СПАЛ.
