Со натпреварот помеѓу Швајцарија и Франција, од 18 часот започнува двојната програма на денешниот ден во Берлин на ЕП во ракомет, а она што е во центарот на вниманието на македонската јавност, е дуелот на Македонија со Германија од 20.30.
Дел од македонските навивачи немаат билети, па порано дојдоа пред сала, со надеж дека ќе имаат среќа да најдат билети од препродавачи (шиткачите бараат од 100 до 120 евра за билет), и ќе може да присуствуваат на мечот за да им дадат поддршка на избраниците на Кирил Лазаров. Оние кои навреме се снабдиле со билети, немаат такви маки.
Бидејќи билетите се врзани за двата меча, надежта за оние без билети е дека ќе има Швајцарци кои не се заинтересирани да го гледаат мечот Македонија – Германија, и ќе сакаат да им ги продадат своите билети.
Пред „Мерцедес Бенз арената“ доминира црвената боја која ја има на знамињата на сите земји од групата, може да се сретнат многу Германци, Македонци, па и Швајцарци кои сега веќе се во сала, само француски навивачи тешко.
