Реал Мадрид не дозволи изненадување во дуелот со Еибар, иако Кралскиот клуб на полувремето беше во негатива. Еибар прв даде гол на „Сантијаго Бернабеу“ и тоа беше по една одлична акција, која ја заврши Марк Кардона во 38 минута. Домаќините дури во второто полувреме решија да покажат зошто се фаворити на овој меч, а Карим Бензема беше стрелец на два погодоци, за целосен пресврт.
Францускиот голгетер најпрво изрмани во 59 минута, а потоа прецизен беше и во 81 минута за 2:1 за Реал. Интересно е што Бензема имаше две големи шанси за да постигне хет-трик, но промашуваше од позиции од кои беше многу полесно да се погоди.
Реал е сигурен на третото место на табелата и сега има 10 бода помалку од лидерот Барселона, која вечерва на „Камп Ноу“ го игра дербито против Атлетико Мадрид.
