Реал Мадрид стигна до петтата победа во исто толку меча од групната фаза од Лигата на шампионите. Кралскиот клуб на свој терен победи со 4:2 против Наполи, во чии редови последните 20-тина минути ги одигра и Елиф Елмас. По овој пораз, Наполи ќе треба во последното коло на домашен терен да остане непоразен од Брага за да ја задржи втората позиција на табелата.
Арсенал со 6:0 го победи Ленс во меч на кој Топчиите во првото полувреме погодија петпати. Интер на полувремето губеше со 0:3 од Бенфика, но во вториот дел Нераѕурите целосно се вратија во игра, постигнаа три гола и стигнаа до бод.
Баерн Минхен во меч кој не им значеше многу одигра без голови против Копенхаген. Немаше голови ниту на дуелот Реал Сосиедад – Салцбург, додека Брага и Унион Берлин ремизираа 1:1.
