Реал Мадрид вчера загуби на гостувањето кај Мајорка со 1:0 и Кралскиот клуб сега заостанува дури осум бода зад големиот ривал Барселона во трката за титулата во Примера дивисион.
Тимот на Карло Анчелоти делуваше немоќно на теренот, иако доминираше со посед на топка и упати дури 20 шутеви кон противничкиот гол. Од тие 20 удари кон голот на Мајорка, само еден беше во рамките на голот, и тоа беше шутот на Марко Асенсио од пенал. Ударот на Асенсио го одбрани голманот Рајковиќ и едноставно ги откажа гостите, кои беа без повеќемина стартери.
Поради повреда ги немаше Бензема и Милитао, а непосредно пред мечот се повреди и голманот Куртоа. Модриќ, Крос и Алаба беа резерви и влегоа во вториот дел, но ниту нивното присуство на теренот не ја смени многу јаловата иницијатива на фаворитот.
Статистиката покажува дека Реал Мадрид толку непрецизен во нападот не бил дури 15 години. Од март 2008 година на дуелот против Депортиво Ла Коруња се немаше случено Реал да не упати прецизен удар во рамките на противничкиот гол, а тоа да не е од пенал.
Анчелоти по мечот објасни зошто на Асенсио му била дадена довербата да го шутира пеналот, кој го промаши.
„Се знае редот за шутираше пенали. Прво шутираат најдобрите, а тоа се Бензема и Модриќ. Ако тие не се на теренот, тогаш јас одлучувам кој ќе шутира. Изборот би бил на Родриго, но решив тој да не шутира затоа што тој беше многу потресен по промашениот пенал на Светското првенство против Хрватска. Затоа се решив Асенсио да шутира“, објасни Анчелоти.
0 – Against Mallorca, Real Madrid only had one shot on target and that was from a penalty, the first time they failed to register a shot on target in a LaLiga game (excluding penalties) since March 2008 against Deportivo La Coruña under Bernd Schuster. Shipwreck. pic.twitter.com/8qpmCNKrT4
— OptaJose (@OptaJose) February 6, 2023
