Тренерот на Реал Мадрид, Карло Анчелоти, е под постојан притисок и критики од навивачите, особено по високиот пораз од 5-2 против Барселона во финалето на шпанскиот Суперкуп. И покрај тоа што се смета за еден од најуспешните тренери во историјата на фудбалот, со 15 освоени трофеи во својата ера со Реал, моменталната ситуација ја доведува во прашање неговата позиција.
Според шпанскиот медиум „Релево“, Анчелоти бил длабоко погоден од негативната реакција на навивачите на „Сантијаго Бернабеу“ за време на неодамнешната победа од 5-2 против Селта во Купот, која беше обезбедена по продолженија. Тој делумно ја разбира критиката, но верува дека неговата посветеност и резултати заслужуваат поголема поддршка.
Анчелоти смета дека коментарите од навивачите, медиумите и самиот клуб се пренагласени. Се шпекулира дека неговата иднина зависи од резултатите во Лигата на шампионите, а Реал му дал ултиматум.
Во ова натпреварување, Реал Мадрид има три победи и три порази, што ја прави нивната позиција несигурна. Натпреварите против Салцбург и Брест ќе бидат од клучно значење за обезбедување место во нокаут-фазата. Се верува дека Анчелоти ќе остане на својата позиција само ако Реал стигне барем до четвртфиналето.
Италијанскиот стратег се наоѓа во критичен период, каде што секој нареден натпревар може да биде пресуден за неговата иднина во клубот.
Анчелоти освои огромен број трофеи во Реал Мадрид. Најзначајните достигнувања под негово водство вклучуваат три титули во Лигата на шампионите, две во Ла Лига и победа во Купот на Шпанија, а Реал Мадрид сè уште е актуелен шампион на Шпанија и на Европа.
