Фудбалерот кој за десет дена треба да ја добиe Златната топка за најдобар играч во 2022 година, Карим Бензема, не е во најдобра состојба периодов. Го мачат повреди, па засега изостануваат и головите и асистенциите во споредба со минатата сезона.
Бензема играше во Лигата на шампионите против Шахтар во средата, но денеска не тренираше и ќе го пропушти утрешниот меч на кој Реал Мадрид му гостува на Хетафе во дуел од шпанската лига.
Нема официјална потврда од Реал за каква повреда станува збор, а шпанските медиуми пишуваат за замор на мускулите. Кралскиот клуб нема друг добар класичен напаѓач, Бензема е преоптоварен, па тренерот Карло Анчелоти сака да го одмори, бидејќи веќе во вторник има нов меч со Шахтар, а на 16 октомври е мегадербито Ел Класико против Барселона.
Покрај Бензема, утревечер кај Реал ќе ги нема и Тибо Куртоа и Дани Себалјос.
