Шпанскиот гигант Реал Мадрид подготвува силен напад за да ја доведе новата млада на Челзи, 18-годишниот Естевао. Бразилецот блеска оваа сезона во дресот на Сините, а прекрасниот гол против Барселона дополнително го зголеми вниманието околу него, вклучувајќи го и интересот од „Бернабеу“.
Познато е дека Естевао уште од детството е навивач на Реал Мадрид. Тој повеќепати истакна дека израснал гледајќи ги Кралевите, што е детал кој претседателот Флорентино Перес планира да го искористи во обидот да го реализира трансферот уште во зимскиот преоден рок. Желбата на играчот и намерата на клубот се поклопуваат, но патот до договор е далеку од едноставен.
Главниот проблем е долгогодишниот договор на Естевао со Челзи, кој важи до 2033 година. Младиот Бразилец сезонава има пет голови и една асистенција на 17 натпревари, а клубот од Лондон нема намера лесно да се откаже од него.
Според англиските медиуми, Челзи не е подготвен ни да започне преговори, освен ако не се понуди нешто сосема поинакво – конкретно, размена на играчи.
Токму тука се споменува името на Винисиус јуниор. Наводно, Челзи би разгледал понуда само доколку Винисиус е дел од потенцијалната размена, сценарио кое би претставувало една од најголемите трансферни бомби во изминатите неколку години.
