Реал Мадрид вторпат само за два месеци загуби од Шахтар вечерва на гости во Киев и со тоа Кралскиот клуб си го загрози пласманот во нокаут-фазата од Лигата на шампионите. Во последните пет меча во сите натпреварувања, Реал има дури три порази, едно реми и само една победа. И покрај ваквиот негативен биланс, тренерот Зинедин Зидан не размислува да си поднесе оставка.
„Воопшто не размислувам за оставка. Точно е дека ова е лош резултат, но ние мора да продолжиме да работиме. И претходно сме имале тешки моменти. Имаме уште еден меч во групата и тој треба да го добиеме“, рече Зидан.
Со двата примени гола вечерва во Киев, Реал постави негативен клупски рекорд. За првпат во групната фаза Кралевите примаат дури девет голови, а интересно е што има уште еден меч да се игра до крајот. Токму лошата игра во одбраната е главна причина поради која Реал во моментов е на третото место во групата и неизвесен пласман во Топ 16 фазата.
