Репрезентативната пауза во која се одржа циклус за мундијалските квалификации му создаде главоболки на Томас Тухел. Двајца играчи на Челзи се вратија во клубот со повреди и отпаднаа од комбинација за настап во следните неколку натпревари.
Тухел го загуби адутот во средината Н’голо Канте, кој утре дефинитивно нема да игра против Астон вила, а надежите се дека Французинот ќе закрепне до премиерното коло во Лигата на шампионите, во кое бранителот на титулата го пречекува Зенит во вторник навечер. Иако беше дел од тимот на Триколорите изминативе две недели, Канте не одигра ниеден меч за репрезентацијата.
Кристијан Пулишиќ го чека подолга пауза, од околу 10 дена а можеби и повеќе, што значи ќе ги пропушти следните две кола во Премиер лигата, како и дуелот против Зенит. Американецот доста се потроши настапувајќи за селекцијата на САД, го оштети зглобот и во наредниве денови мора да се движи на патерици.
Сините утре попладне против Астон вила ќе се обидат да се вратат во победнички ритам откако минатиот месец го завршија со реми од 1-1 во дербито против Ливерпул, а пред тоа нанижаа победи против Кристал палас и Арсенал.
