Шпанските репрезентативци од Барселона, Гави, Педри, Ламин Јамал, Пау Кубарси, Марк Касадо, Фермин Лопес и Феран Торес, планирале да објават своевиден бојкот на шпанската репрезентација доколку нивните соиграчи Дани Олмо и Пау Виктор не добиеја дозвола за регистрација за вториот дел од сезоната во Ла Лига, објави шпанскиот весник „АС“.
Играчите на Барселона биле подготвени да користат изговори како повреди и неподготвеност за да избегнат повик од селекторот Луис де ла Фуенте. Следните натпревари на Црвената фурија се четвртфиналните дуели против Холандија во Лигата на нациите, закажани на 20 и 23 март. Потенцијален успех би значел пласман во завршната фаза на турнирот, која ќе се одржи на почетокот на јуни.
Не е јасно дали оваа идеја е иницирана од самите играчи или е дел од стратегијата на раководството на Барселона, кое можеби го користело како притисок за решавање на ситуацијата.
Дани Олмо и Пау Виктор останаа без регистрација на 1 јануари, откако Ла Лига привремено ги одзеде нивните лиценци. Шпанската фудбалска федерација одби да го разгледа случајот, повикувајќи се на недостаток на надлежност, а жалбите на Барселона беа одбиени на две судски инстанци. Меѓутоа, во средата, Врховниот спортски совет при Министерството за образование и спорт на Шпанија донесе одлука за привремено враќање на регистрациите на Дани Олмо и Пау Виктор.
