Денес и официјално започна комплетна санација на тревникот на Националната арена „Тодор Проески“ во Скопје. Новиот хибриден тревник кој ќе се состои од 70% вештачка и 30% природна трева е донација на ФФМ и УЕФА.
Сето тоа значи дека во иднина репрезентацијата ќе има идеални услови за тренинг и натпревари, а комплетната санација треба да биде завршена пред натпреварот со Англија на 20 ноември.
„Отпочнуваме со активности на Националната арена ‘Тодор Проески’ во насока на целосна ревитализација на тревната површина и нејзините пропратни елементи. АД за изградба и стопанисување со станбен простор и со деловен простор од значење за Републиката во соработка со ФФМ отпочнува процес на целосно менување на тревната површина коешто последен пат е изведен во 2012 година.
Проектот е донација од ФФМ преку УЕФА и се очекува да биде готов пред националниот натпревар со Англија на којшто ќе можеме да се пофалиме со нова, најсовремена тревна површина согласно највисоките стандарди на меѓународните фудбалски институции. Дополнително, пред поставување на тревната површина нашето Друштво активно работи на надградба на системот за наводнување на тревата на начин којшто ќе биде најадекватен за новото игралиште. Вредноста на инвестицијата и на донацијата ќе биде дополнително истакната кога ќе се презентира целиот овој проект како реализиран. Новите услови на Националната арена ќе ги подобрат условите за работа на националниот и клупскиот фудбал и генерално се во насока на успешно развивање на спортот во РСМ“, се вели во соопштението на АД за изградба и стопанисување со станбен простор и со деловен простор.
