Ријека е новиот освојувач на Купот на Хрватска, откако на реванш-мечот од финалето, на „Рујевица“ го совлада Славен Белупо со 1-0 и ја обедини „двојната круна“ во хрватскиот фудбал.
Натпреварот не понуди многу возбудувања во првото полувреме, каде што наместо фудбал, во фокус беа грубите стартови на обете страни. Ситуацијата на теренот се промени во вториот дел, кога Наис Џуахра во 60-тата минута со прецизен удар го постигна единствениот гол и го реши победникот.
Финишот на мечот донесе тензија, во судиското продолжение дојде до судир меѓу Адријан Јагушиќ и неколку играчи на Ријека, при што мораа да интервенираат тренерите и клупите на двата тима. Инцидентот кулминираше кога од трибините беше фрлено шише што го погоди играчот Иван Чубелиќ во глава.
Во 93-тата минута, Љубан Крепуља ја погоди стативата и иницираше силен финишен притисок на Славен Белупо, но Ријека успеа да го задржи минималното водство до последниот свиреж.
Во финалниот дуел, македонскиот напаѓач Илија Несторовски одигра цел натпревар за Славен Белупо, додека дефанзивецот Јован Манев од клупа го проследи триумфот на својот тим, Ријека.
