Рио: Сити има играч кој е подобар од Халанд

Поранешниот дефанзивец на Манчестер јунајтед имаше само пофални зборови за играта на 20-годишниот Фил Фоден по победата на Манчестер сити против Пари Сен Жермен од 2:0. Фоден одигра одличен меч, а беше и асистент за вториот погодок на Ријад Марез. Според Фердинанд, Фоден во моментов е најдобар млад играч во светот.

„Во овој момент, по моменталната форма, можам да кажам дека Фоден е најдобар млад фудбалер во светот. Ерлинг Халанд допрва треба да дојде на тоа ниво на игра. Ако се гледа сегашната форма, Фоден е најдобар“, вели Фердинанд.

Фоден, кој сезонава игра одлично и досега има 14 гола и 10 асистенции, на крајот на овој месец ќе го прослави 21-виот роденден. Фердинанд додаде дека градскиот ривал на Јунајтед игра одлично.

„Не сум навивач на Сити, но уживам да ги гледам како играат. Марез, Стерлинг, Де Бројне, Силва, Гундоган…нивниот напад, течната нивна игра… тоа е тотален фудбал. Секоја чест за Пеп Гвардиола и неговите навивачи“, додаде Фердинанд.

Манчестер сити вечерва ќе го дознае својот ривал во финалето од ЛШ, а тоа ќе биде подобриот од двомечот меѓу Челзи и Реал Мадрид.

 

- Оглас -

Најнови вести