Киксот на Светското клупско првенство не ги расипа плановите на раководството на Ривер плејт за организирање забава по повод освојувањето на трофејот во Копа Либертадорес. В недела, на стадионот „Монументал“ во Буенос Аирес, пехарот од Копа Либертадорес ќе им биде покажан на фановите кои немаа прилика да отпатуваат во Мадрид, каде што се играше финалето против ривалот Бока јуниорс.
Ривер в сабота треба да игра против Кашима антлерс за третото место на светското клупско во Абу Даби, а потоа конечно ќе се врати дома и ќе слави со 60.000 свои навивачи.
На лицата на фудбалерите на аргентинскиот гигант има замор, разочараност и тага по поразот од Ал-Аин во полуфиналето, но расположението сигурно ќе им биде подобро в недела, кога на својот стадион ќе добијат поддршка од фановите на кои поважна им беше титулата првак на Јужна Америка, отколку светската.
