Новиот ракометен клуб Алкалоид, имаше одличен старт на новата сезона во Првата лига (второ по ранг натпреварување кај нас, зад Суперлигата), откако славеше над Металург РА со убедливи 37-18.
Алкалоид е клуб што беше формиран летово, и има задача со искусен стручен штаб (Љубомир Савевски е главен тренер, му помагаат Биљана Црвенковска, Бранислав Ангеловски и Влатко Котески, а кондициски тренер е Петар Баснарков) кој води тим со млади и талентирани играчи, да обезбеди влез во елитното друштво. Мечевите како домаќини ги играат во „Борис Трајковски“, а според тоа како тргнаа, нема да биде изненадување ако успеат.
Крилото Стојков беше прв стрелец на Алкалоид со девет погодоци, седум постигна Кофиловски, а шест имаше Тодески.
