Фудбалерите на Рома ќе ја чекаат следната 2023 година за да се обидат да слават на гости против Сасуоло откако вечерва во рамките на 14-тото коло во Серија , одиграа 1:1.
Римската волчица последен пат славела во Сасуоло во 2018 година (0:1) и оттогаш има еден пораз и четири ремија.
Мечот во Сасуоло се играше како по „нотите“ на Жозе Мурињо, речиси 70-тина минути немаше ниту една сериозна шанса за гол на двете страни, а потоа играчот од средниот ред на Сасуоло, Траоре, очајно шутираше и пропушти да му донесе водство на својот тим.
Казната стигна само три минути подоцна, Манчини нафрли од десната страна, а Абрахам фантастично реагираше во скокот и со глава го матира Консилји за 0:1.
Иако се очекуваше Мурињо да го „паркира автобусот“ пред својот гол, Сасуоло во 85-тата минута благодарение на голот на Пинамонти, дојде до израмнување.
Рома е петта на табелата со 26 бодови, а Сасуоло е на 13-тото место со 16 бодови.
Аталанта влезе во мини-криза откако вечерва го доживеа вториот пораз за четири дена во Серија А. По поразот во дербито со Наполи (1:2), Аталанта сега загуби од Лече со 2:1.
Домаќинот до победата дојде со два „блицкриг“ за 120 секунди. Федерико Баширото погоди за 1:0 во 27-мата минута, а Ди Франческо во 29-тата донесе водство од 2:0. Аталанта единствено што успеа да направи е да намали на 2:1 во 40-тата минута преку Дуван Запата.
