Македонската ракометна репрезентација за играчи до 20 години го претрпе првиот пораз на ЕХФ шампионатот во Варна откако убедливо со 31:21 загуби од Романија. Романците и пред мечот беа фаворити за победа, па конечниот исход не е изненадување.
Нашите млади ракометари држеа ритам во првите 10-тина минути, кога водеа со 5:4, но потоа Романците со серија од 4:0 стигнаа до 8:5, а на полувреме водеа со 15:11. На почетокот на вториот дел Романија стигна и до 18:11 и веќе беше јасно кој ќе победи.
По три одиграни кола, Македонија има победа, пораз и реми и со три бода е на третото место во групата каде што Швајцарија е лидер со максимални шест бодови, а Романија е втора со четири бода. Украина исто како Македонија има освоено три бода, а Косово е последен без ниту еден бод.
Во полуфиналето место обезбедуваат првите две селекции, што значи дека во последното коло Македонија ќе мора да ја совлада фаворизираната Швајцарија, а Романија да киксне против Украина. Ова сценарио е речиси невозможно, па такви се и шансите на Македонија за влез во полуфиналето.
