Македонија за помалку од 24 часа ќе го започне историскиот меч против Исланд во Скопје. Победа на Македонија ќе значи и првпат да завршиме на второ место во едни квалификации за големо натпреварување и учество во баражот за пласман на Светското првенство.
Исланд беше селекцијата која ни помогна да „скокнеме“ на второто место во групата, откако Рибарите пред три дена одиграа 0:0 против Романија во Букурешт. По тој меч, селекторот на Исланд Арнод Видарсон изјави дека ќе се обиде и во Скопје да остане непоразен, а потоа ќе чека Романците да го почестат со пиво.
Романците не ја заборавија оваа изјава на селекторот на Исланд, па денеска во Скопје на неколку билборди поставија порака за нашите гости.
„Драг Арнод Видарсон, пивото е подготвено“, пишува во пораката на билбордот поставен од еден од спонзорите на романската фудбалска федерација.
