Јувентус го освои првото место во својата група од Лигата на шампионите иако синоќа загуби на гостувањето кај Јанг бојс со 2-1. Швајцарскиот тим и покрај победата, е елиминиран од европските купови бидејќи заврши на последното место.
За достојно простување од ЛШ, Јанг бојс на своите навивачи им приреди убав меч и победа против најтрофејниот клуб во Италија. Домаќините имаа предност од 2-0, а Дибала во 80-тата минута намали на 2-1. Аргентинскиот голгетер имаше можност да го спаси Јувентус од пораз, но Кристијано Роналдо е виновен за тоа да не се случи.
Се играше 93-тата минута, Дибала доби една топка на 20-тина метри од голот, силно шутираше и таа заврши во мрежата на домаќините. Сепак, наместо радост за Јувентус, судијата досуди офсајд, и тоа поради Роналдо. Португалецот воопшто не играше со топката, но по шутот на Дибала, непотребно се обиде да игра со глава, а беше во позиција офсајд. Во таква ситуација, кога играчот иако не играл со топката, сепак можел да влијае на нејзиното движење, судиите досудуваат офсајд, па затоа и овојпат одлуката на арбитерот беше правилна, а глупавиот потег на Роналдо ја скрати радоста на Дибала и донесе пораз за Јувентус.
Ситуацијата од поништениот гол во 93-тата минута за Јувентус може да ја погледнете на видеото од 4:40 минута.
