Италијанскиот првак Јувентус е пред најважниот испит сезонава. „Старата дама“ во Торино ќе го игра реванш-мечот од осминафиналето во Лигата на шампионите. Уште пред да започне сезоната, главна цел на Јувентус беше да се освои трофејот во најелитното европско натпреварување.
Сепак, уште на првата пречка од нокаут-фазата, италијанскиот првак се сопна по првите 90 минути. Атлетико има водство од 2-0 и вечерва ќе се обиде да ја задржи оваа предност и да го елиминира Јувентус. Сепак, најтрофејниот италијански клуб не за џабе пред сезоната го доведе Кристијано Роналдо, играчот кој четири пати во последните пет години триумфираше во Лигата на шампиони, но во дресот на Реал Мадрид. Роналдо верува дека вечерва може да се случи пресврт и Јувентус на крајот да се радува.
„Треба да останеме позитивни и да веруваме. Можно е да направиме камбек против Атлетико, но секако ни е потребна помош и од навивачите. Заеднички може да успееме. Подгответе се за пресврт“, порача Роналдо како најава за тешка борба на теренот во Торино.
