Легендата на Манчестер јунајтед, Вејн Руни, прогнозира дека ѕвездата на Ливерпул, Мохамед Салах, можеби ќе го напушти клубот уште во јануарскиот трансфер прозорец поради лошата форма во последно време.
33-годишниот Салах, кој минатата година беше прогласен за најдобар играч на сезоната и имаше клучна улога во освојувањето на титулата со Ливерпул, оваа сезона делува без самодоверба. Неговиот пад во формата се совпадна со серијата од четири порази на Црвените, вклучувајќи го и дербито со Манчестер јунајтед.
На овој дуел, како и на претходниот со Челзи, Египќанецот промаши неколку одлични шанси.
„Салах одигра многу натпревари во последните неколку години. Тој беше главниот човек и го носеше тој притисок на плеќите. Според мене, тој е меѓу петте или седумте најголеми играчи во историјата на Премиер лигата. Мислам дека можеби веќе и малку му е преку глава“, изјави Руни.
Тој додаде дека нема да биде изненаден ако Мохамед Салах го напушти клубот „во јануари или можеби следното лето“. Сепак, Руни не крие дека е восхитен од неговите квалитети.
„Ми беше задоволство да го гледам, тој е фантастичен фудбалер, но мислам дека едноставно му е преку глава во овој момент.“
