Поминаа речиси три месеци од трагичната несреќа во која животот го загуби Коби Брајант. Легендарниот играч на Лос Анџелес лејкерс заедно со својата 13-годишна ќерка Џиџи и уште седум патници, беа во хеликоптерот кој се сруши во близина на ЛА.
Илјадници луѓе жалеа за прераната смрт на Брајант, но сепак најголемиот товар падна на неговата жена Ванеса и најблиското семејство. Вчера беше денот на кој пред 19 години, Коби и Ванеса стапија во брак. Традиционално секоја година, Коби со букет ружи ја честитал годишниата.
И овојпат Ванеса го доби цвеќето, но Коби го немаше. Тоа беше испратено од нејзините ќерки, а Ванеса испрати порака.
„Мојот крал, срцето мое, мојот најдобар пријател. Сѐ најубаво за 19-годишнината од бракот, душо. Толку многу ми недостасуваш. Би сакала да си тука. Те сакам“, беше пораката на Ванеса.
