Култниот италијански фудбалски клуб Сампдорија успеа да го задржи своето место во Серија Б откако Дисциплинската комисија му додели службена победа од 3-0 против Салернитана во реванш-дуелот од баражот за опстанок.
Натпреварот, кој се одигра во неделата на теренот на Салернитана, беше прекинат поради нереди предизвикани од домашните навивачи. Тие фрлаа димни бомби и седишта на теренот, што доведе до прекин на мечот и последователна одлука на Федерацијата да го регистрира натпреварот со службен резултат во корист на Сампдорија.
Со оваа одлука тимот од Џенова го доби двомечот со вкупни 5-0 и ја обезбеди својата егзистенција во втората италијанска лига, избегнувајќи испаѓање во Серија Ц.
Интересно е што Сампдорија првично беше испадната во Серија Ц за првпат во својата 78-годишна историја, но клубот доби втора шанса откако Бреша загуби поени поради финансиски неправилности, што ѝ овозможи на Сампдорија да остане над нив на табелата.
