На денешниот попладневен тренинг на Јувентус се појави Кристијано Роналдо, кој тренираше нормално со соиграчите, подготвувајќи се за стартот на сезоната и мечот со Парма, но го немаше тренерот Маурицио Сари.
Од Јуве, со соопштение ја известија јавноста дека Сари е болен и дека проблемите ги има од минатата недела. Овој 60-годишен стручњак, кој летово стана тренер на италијанскиот првак, има пневмонија, објавија медиумите на Апенинскиот Полуостров. Тој бил присутен во тренинг-центарот и им давал инструкции на помошниците, но лично не се најде на терен. На Сари му е препишана специфична терапија и неизвесно е кога ќе дебитира на официјален меч на клупата на Бјанконерите.
Јуве првиот меч од новата сезона во Серија А го игра в сабота, од 18 часот, па ако Сари не биде доволно закрепнат, екипата ќе ја води асистентот Џовани Мартушело, исто како на пријателскиот меч со Триестина.