Македонската фудбалска репрезентација ги доби ривалите за четвртото издание на Лигата на нациите. Повторно ќе бидеме во Сегментот Ц, а ждрепката сакаше да се најдеме во групата 4, во која ќе бидеме заедно со селекциите на Ерменија, Фарски Острови и Летонија.
Оваа група е како посакувана за Македонија затоа што ова се ривали од кои не смее да се плашиме. И традицијата покажува дека Македонија е фаворит во ова друштво затоа што со сите три противника имаме позитивен биланс.
Ерменија ни е како судбина во Лигата на нациите, па по третпат од четирите изданија ја имаме во нашата група. Со овој ривал сме играле вкупно 13 пати и имаме шест победи, три нерешени и четири порази во вкупна гол-разлика од 23 дадени и 18 примени гола.
Против Летонија имаме играно трипати и во сите три меча имаме победа, со вкупна гол-разлика од седум дадени и само два примени гола. Фарски Острови е ривал против кого имаме само еднаш играно, и тоа лани во Скопје, кога ги победивме минимално со 1:0.
