Европското првенство 2028 сè уште не е ни на повидок, европските квалификации за Светското првенство во Северна Америка 2026 година се на самиот почеток, но УЕФА објави каков ќе биде форматот на квалификациите за турнирот во Велика Британија и Ирска.
Првата промена во форматот од квалификациите за ЕП 2028 година е тоа што ќе има дополнително две групи. Наместо планираните 10, каде што првите две екипи би се квалификувале за Европското првенство, УЕФА одлучи да додаде две групи.
Тоа значи дека групите сега ќе се состојат од четири или пет екипи наместо претходните пет или шест. Она што се менува е тоа што сега само победниците во групите имаат загарантиран пласман на Европското првенство, додека второпласираните ќе мора да се плашат бидејќи само првите осум од 12 ќе одат на најголемиот европски настан.
Ова ќе ги одреди 20-те места што ќе одат на Европското првенство и треба да се утврди кои четири репрезентации ќе ја пополнат квотата од 24. Иако земјите домаќини не добија директно место на Европското првенство, тие сепак добија привилегирана позиција.
УЕФА им даде на домаќините две загарантирани места во првенството. Така, двата највисокорангирани (по групи, а не по ранг-листата на ФИФА или УЕФА) домаќини кои не обезбедија место на Европското првенство, исто така одат на Европското првенство. Значи, ако Англија, Шкотска, Велс и Република Ирска не обезбедат место на првенството, тие треба само да бидат подобри од две земји за да стигнат до Европското првенство. Ако земеме предвид дека Англичаните дефинитивно ќе бидат на Европското првенство, тогаш доволно е секоја репрезентација да биде подобра од една репрезентација.
Како ќе изгледа плејофот за преостанатите позиции?
Заедно со објаснувањето на позициите за домаќините, УЕФА даде и увид во тоа како ќе изгледаат плејофот за Европското првенство. Постојат три варијанти и секоја зависи од тоа дали местата резервирани за домаќините се искористени.
Доколку се искористат обете места, тогаш плејофот во којшто ќе учествуваат највисокорангираните екипи кои не се квалификувале за Европското првенство ќе има осум учесници. Потоа натпреварувањето ќе има две кола, со неповратни натпревари, а победниците ќе се пласираат на Европското првенство.
Доколку се искористи само едно место резервирано за домаќините, тогаш плејофот скокнува на 12 учесници, а ќе има и уште едно коло. Потоа тројцата победници од мини-турнирот, на којшто нема реванши, одат на Европското првенство.
Доколку сите земји домаќини го обезбедат своето место на Европското првенство преку квалификациите, тогаш УЕФА организира четири натпревари со реванш-натпревари од кои победниците одат на Европското првенство.
