Шампионот Манчестер сити по шест победи во првите шест кола, денеска го доживеа првиот пораз во сезоната во Премиер лигата. Граѓаните загубија со 2:1 на гостувањето кај Вулверхамптон.
Сити беше шокиран уште на стартот, кога Рубен Дијаш во 13-та минута си ја затресе сопствената мрежа. По примениот гол, Граѓаните тргнаа на се или ништо и успеаја во 58-та минута да дојдат до израмнување преку Хулијан Алварес.
Но, во моментите кога имаа целосна иницијатива на стадионот „Молино“, домаќинот прекѕ Хе-Чан Хванг во 66-та минута постигна нов гол за водство од 2:1.
Фудбалерите на Манчестер јунајтед ги разочараа своите навивачи губејќи од Кристал палас со 0:1 и тоа на „Олд трафорд“.
Иако пред четири дена, Јунајтед на „Олд трафорд“ славеше со 3:0 над Кристал палас во Лига купот, денеска тимот од Лондон се реваншира. Човек на одлука беше Андерсен кој голот вреден три бода за Кристал палас го постигна во 25-та минута.
Арсенал без никакви проблеми со 4:0 славеше на гостувањето кај Борнмут. Резултатот го отвори Букајо Сака во 16-та минута, а потоа од белата точка беа прецизни Мартин Одегард и Каи Хаверц.Конечниот резултат го постави Бен Вајт.
Триумф пред своите гледачи оствари и Њукасл и тоа од 2:0 против Барнли. Мигел Алмирон во 14-та минута го отвори резултатот, а победата ја завери Александер Исак во 76-та од пенал.
Вест хем беше сигурен пред своите гледачи и славеше со 2:0 против Шефилд јунајтед, додека Лутон приреди изненадување и со 2:1 го совлада Евертон.
