Изминатиот период се води вистинска војна во Барселона помеѓу раководството на клубот и Марк-Андре тер Штеген. Многу работи беа изнесени во јавност, а сега германскиот голман одлучи да ја напише и својата страна од приказната.
„Последниве неколку месеци беа особено тешки за мене – и физички и лично. Како и за секој играч, по повредата мојот единствен приоритет беше што побрзо да се вратам на теренот, воден исклучиво од желбата да му помогнам на тимот и да го правам она што најмногу го сакам – да се натпреварувам. Во последните недели многу се зборуваше за мене, а дел од тие информации се целосно неосновани. Поради тоа, сметам дека е важно да ја изнесам мојата верзија на настаните, со почит, но јасно. Одлуката за операцијата беше донесена по консултации со медицинските стручњаци и со целосна согласност на клубот. Моето здравје и долгорочната спортска кариера отсекогаш ми биле на прво место – што, секако, е во согласност со целите на Барселона – што побрзо да се вратам на терен и да продолжам да освојувам трофеи. Исто така, јавно го објавив минималното време за опоравување кое ми беше препорачано од најугледните стручњаци, и тоа во постојана координација со клубот. Би сакал да појаснам – имајќи предвид одредени шпекулации – дека сите доаѓања и продолжувања на договорите во клубот беа договорени пред мојата операција. Со тоа, никако не е можно јас, поради мојата несреќна ситуација и новата операција, да сум бил потребен за регистрација на други играчи кои исклучително ги почитувам и со кои со задоволство ќе ја делам соблекувалната уште многу години. Секоја поинаква интерпретација ја сметам за неправедна и неточна. Во текот на целата моја кариера се стремев да се однесувам професионално, со почит и посветеност кон грбовите што сум ги претставувал. Имам длабоки чувства кон Барселона, овој град и навивачите кои се со мене со години. Мојата верност кон овие бои останува неприкосновена. Разбирам дека тешките моменти можат да предизвикаат напнатости, но верувам дека преку разговор и одговорност оваа ситуација може да се реши на конструктивен начин. Целосно сум подготвен да соработувам со управата на клубот за да ја разрешиме оваа ситуација и да обезбедиме потребни одобренија. Многу работи можеби се промениле, но едно останува исто: Ве сакам!“ – напиша Тер Штеген.
